635/2003

Reglugerð um takmörkun á notkun stuttkeðju klórparaffína. - Brottfallin

635/2003

Markmið reglugerðar þessarar er að takmarka notkun á stuttkeðju klórparaffínum (CAS nr. 85535-84-8) í iðnaði.

Reglugerðin nær til vara sem innihalda stuttkeðju klórparaffín enda sé þyngdarhlutfall þeirra hærra en 1%.

Með stuttkeðju klórparaffínum er í reglugerð þessari átt við klóraða alkana úr kolefniskeðjum með 10 til 13 kolefnum og með klórinnihald a.m.k. 48 g fyrir hver 100 g af efninu.

Óheimilt er að framleiða, flytja inn, selja eða nota vörur með stuttkeðju klórparaffínum, sbr. 3. gr. til notkunar við málmvinnslu og í leðurfeiti.

Framleiðsla, innflutningur, sala og notkun stuttkeðja klórparaffína til eftirfarandi nota er jafnframt óheimil:

1.	Sem mýkiefni í málningu og öðrum húðunarvörum.
2.	Til notkunar sem eldvarnarefni í gúmmíi, plasti eða vefnaði.
3.	Sem mýkiefni í þéttiefnum.

Heilbrigðiseftirlit sveitarfélaga, undir yfirumsjón Umhverfisstofnunar, hefur eftirlit með framkvæmd reglugerðar þessarar að öðru leyti en því sem fellur undir lög nr. 46/1980 um aðbúnað, hollustuhætti og öryggi á vinnustöðum.

Fyrir brot gegn reglugerð þessari skal refsa með sektum nema þyngri refsing liggi við samkvæmt lögum.

Reglugerð þessi er sett með stoð í 18. gr. laga nr. 52/1988 um eiturefni og hættuleg efni, lögum nr. 32/1986 um varnir gegn mengun sjávar og lögum nr. 7/1998 um hollustuhætti og mengunarvarnir, með síðari breytingum.

Reglugerðin er ennfremur sett með hliðsjón af 4. tl., XV. kafla, II. viðauka samningsins um Evrópskt efnahagssvæði, tilskipun nr. 76/769/EBE um samræmingu ákvæða í lögum og stjórnsýslufyrirmælum aðildarríkjanna varðandi takmörkun á sölu og notkun tiltekinna skaðlegra efna og efnablandna, eins og henni var breytt með tilskipun 2002/45/EB.

Reglugerðin öðlast þegar gildi.

Ákvæði 1. mgr. 4. gr. tekur gildi 6. janúar 2004. Ákvæði 3. tl. 2. mgr. 4. gr. tekur gildi 31. desember 2004.