Reglugerð um merkingar og upplýsingaskyldu varðandi orkunotkun lampa til heimilisnota. - Brottfallin

I. KAFLI

Gildissvið.

1. gr.

Rafmagnslampar til heimilisnota sem eru tengdir dreifikerfi rafveitu þar með taldir glóperulampar og smáflúrlampar með innbyggðri straumfestu einnig venjulegir flúrlampar og smáflúrlampar án innbyggðrar straumfestu. Jafnvel þó að lamparnir séu settir á markað til annars en heimilisnotkunar, skal við markaðssetningu og tilboð um sölu eða leigu fylgja þeim upplýsingar um orkunotkun samkvæmt reglugerð þessari.

Eftirtaldir lampar skulu falla utan gildissviðs þessarar reglugerðar:

a. lampar með meira en 6500 lúmena ljósstreymi;

b. lampar með minni aflnotkun en 4 vött;

c. lampar með endurkastshlífum;

d. lampar sem eru fyrst og fremst markaðssettir eða seldir til notkunar með öðrum orkugjöfum, til að mynda rafhlöðum;

e. lampar sem eru ekki fyrst og fremst markaðssettir eða seldir til framleiðslu sýnilegs ljóss (öldulengd 400 til 800 nm);

f. lampar sem eru markaðssettir eða seldir sem hluti vöru sem er ætlað annað grunnhlutverk en að vera ljósgjafi. Lampi sem er boðinn til sölu, leigu eða kaupleigu eða sýndur einn og sér, t.d. sem varahlutur, fellur þó undir reglugerðina.

II. KAFLI

Skilgreiningar.

2. gr.

Í reglugerð þessari er merking eftirfarandi hugtaka sem hér segir:

Birgðasali: Framleiðandi lampa, viðurkenndur fulltrúi framleiðanda á Evrópska efnahagssvæðinu, innflytjandi lampa eða sá sem markaðssetur lampa á efnahagssvæðinu.

Seljandi: Smásöluaðili eða annar sem selur, leigir eða sýnir notendum lampa.

III. KAFLI

Merkingar og upplýsingar.

3. gr.

Merkimiðinn skal vera með þeim hætti sem tilgreint er í I. viðauka við tilskipun framkvæmdastjórnarinnar 98/11/EBE. Skal miðanum komið fyrir eða hann prentaður eða festur utan á umbúðir sjálfs lampans þannig að hann sjáist greinilega og ekkert skyggi á hann.

Á þeim lömpum, sem dreift er á Íslandi, skulu merkimiðarnir vera á íslensku.

Aðra merkimiða, merki, tákn eða áletranir en skv. 1. mgr. má ekki setja á lampa eða umbúðir lampans ef slíkt kann að vera villandi.

4. gr.

Birgðasali skal sjá til þess að lömpum fylgi upplýsingablað sem veiti staðlaðar upplýsingar um viðkomandi lampa. Blaðið skal setja inn í kynningarrit frá birgðasala. Séu slík rit ekki fyrir hendi hjá birgðasala skal upplýsingablaðið vera sérstakt skjal. Blaðið skal vera í samræmi við II. viðauka við tilskipun framkvæmdastjórnarinnar 98/11/EBE.

Upplýsingablöð um lampa, sem dreift er á Íslandi, skulu vera á íslensku.

5. gr.

Upplýsingar á merkimiðum skv. 3. gr. og upplýsingablöðum skv. 4. gr. skulu byggðar á tæknilegum gögnum um viðkomandi lampa.

Tæknilegu gögnin skulu hafa að geyma:

1. nafn, vörumerki og heimilisfang birgðasala;

2. almenna lýsingu á lampanum sem er nægilega ítarleg fyrir einhlíta skilgreiningu hans;

3. upplýsingar, þar með taldar teikningar ef við á, um helstu hönnunareinkenni lampans, einkum atriði sem hafa umtalsverð áhrif á orkunotkun hans;

4. skýrslur um viðeigandi mælingar og prófanir sem gerðar hafa verið samkvæmt samhæfðum stöðlum skv. 4. mgr. 1. gr. tilskipunar framkvæmdastjórnarinnar 98/11/ EBE;

5. leiðbeiningar um notkun ef þær eru fyrir hendi.

6. gr.

Upplýsingar um hávaða, sem berst frá lampa, ber að meta í samræmi við reglugerð nr. 524/1994 um hávaða sem berst í lofti frá heimilistækjum.

IV. KAFLI

Skyldur birgðasala og seljanda.

7. gr.

Birgðasali skal sjá til þess að merkimiðar, upplýsingablöð og tæknileg gögn skv. 3. - 6. gr. séu fyrir hendi.

Birgðasali skal hafa til reiðu öll tæknileg gögn sem nægja til að leggja mat á nákvæmni upplýsinga vegna hugsanlegrar skoðunar á lampa næstu fimm árin eftir að það var síðast framleitt.

8. gr.

Birgðasali skal láta seljanda í té merkimiða á íslensku án endurgjalds.

9. gr.

Seljandi, sem stillir út lampa, skal festa merkmiða skv. 3. gr. við hann.

Seljandi skal gefa kaupanda kost á að kynna sér upplýsingablað um lampa skv. 4. gr.

10. gr.

Séu lampar boðnir til sölu eða leigu og þeim komið á framfæri með prentaðri orðsendingu, svo sem póstpöntunarlista, verðlista eða öðrum hætti þar sem hugsanlegur kaupandi getur ekki séð lampann útstilltan og neytendur eru hvattir til að panta lampann til afhendingar beint, skal orðsending hafa að geyma allar þær upplýsingar sem tilgreindar eru í III. viðauka (póstverslun og önnur fjarsala) við tilskipun 98/11/EBE, sbr. 16. gr. reglugerðar þessarar.

V. KAFLI

Eftirlit.

11. gr.

Iðnaðarráðherra fer með framkvæmd reglugerðar þessarar. Ráðherra getur falið öðrum aðilum að annast eftirlit með því að ákvæðum reglugerðarinnar sé fylgt. Kallast þeir aðilar eftirlitsaðilar.

12. gr.

Eftirlitsaðilar geta farið fram á að birgðasalar afhendi þeim merkimiða skv. 3. gr., upplýsingablöð skv. 4. gr. og orðsendingar skv. 10. gr. varðandi lampa.

Seljandi skal gefa eftirlitsaðilum upplýsingar um það frá hvaða birgðasala lampinn sé ef þess er óskað.

13. gr.

Telji eftirlitsaðilar að upplýsingar þær sem veittar hafa verið séu rangar er þeim heimilt að krefja birgðasala og seljanda um öll gögn, m.a. tæknileg gögn, sem nauðsynleg eru við eftirlit.

Ef upplýsingar þær sem veittar hafa verið eru ekki taldar byggjast á fyrirliggjandi gögnum getur eftirlitsaðilinn krafist þess að birgðasalinn endurskoði merkimiðann, upplýsingablaðið og önnur gögn innan ákveðins frests.

14. gr.

Verði birgðasali ekki við kröfu eftirlitsaðila skv. 2. mgr. 13. gr. er eftirlitsaðilum heimilt að krefjast þess að birgðasali leggi án endurgjalds fram lampa til skoðunar. Skal birgðasalinn greiða kostnað við skoðunina nema upplýsingar hans hafi reynst réttar.

Birgðasali skal bera kostnað af eftirliti.

15. gr.

Hafi iðnaðarráðuneytið falið öðrum aðila eftirlit með ákvæðum reglugerðar þessarar getur birgðasali kært ákvörðun þess eftirlitsaðila til ráðuneytisins. Kæran skal borin fram innan þriggja mánaða frá því að ákvörðunin var tilkynnt. Að öðru leyti gildir 27. gr. stjórnsýslulaga nr. 37/1993 um kærufresti.

VI. KAFLI

Gildistaka.

16. gr.

Reglugerð þessi er sett með heimild í 8. gr., sbr. 2. gr. laga nr. 72/1994 um merkingar og upplýsingaskyldu varðandi orkunotkun heimilistækja o.fl.

Reglugerðin er sett á grundvelli eftirfarandi ákvæða EES-samningsins, sbr. IV. kafla II. viðauka við samninginn:

1. tilskipun ráðsins 92/75/EBE frá 22. september 1992 um merkingar og staðlaðar vörulýsingar á heimilistækjum sem greina frá notkun þeirra á orku og öðrum aðföngum (tilskipunin er birt í 3. bók sérstakrar útgáfu EES-viðbætis við Stjórnartíðindi EB á árinu 1994);

2. tilskipun framkvæmdastjórnarinnar 98/11/EBE frá 27. janúar 1998 um framkvæmd tilskipunar ráðsins 92/75/EBE að því er varðar orkumerkingar lampa til heimilisnota (tilskipunin er birt í EES-viðbæti við Stjórnartíðindi EB);

3. ákvörðun sameiginlegu EES-nefndarinnar nr. 17/1999 um breytingar á II. viðauka (Tæknilegar reglugerðir, staðlar, prófanir og vottun) og IV. viðauka (Orka) við EES-samninginn (ákvörðunin er birt í EES-viðbæti við Stjórnartíðindi EB).

Um framkvæmd reglugerðarinnar vísast að öðru leyti í viðkomandi gerðir sem framkvæma skal hér á landi í samræmi við ákvæði EES-samningsins, m.a. bókun 1 við samninginn um altæka aðlögun.

Reglugerð þessi öðlast þegar gildi.

Iðnaðarráðuneytinu, 22. mars 2000.

Valgerður Sverrisdóttir.

Þorgeir Örlygsson.