934/2025

Um framkvæmd samþætts sérfræðimats. REGLUGERÐ um framkvæmd samþætts sérfræðimats.

1. gr. Gildissvið og framkvæmd.

Reglugerð þessi gildir um framkvæmd samþætts sérfræðimats skv. 26. gr. laga um almannatryggingar, nr. 100/2007.

Tryggingastofnun sér um framkvæmd samþætts sérfræðimats á grundvelli viðauka með reglugerð þessari og skal viðaukinn endurskoðaður svo oft sem þörf þykir en þó eigi sjaldnar en á árs fresti.

2. gr. Mat á getu til virkni á vinnumarkaði.

Við framkvæmd samþætts sérfræðimats skal Tryggingastofnun leggja einstaklingsbundið og heildrænt mat á áhrif heilsu, fötlunar, færni og aðstæðna umsækjanda, svo sem persónulegra, félagslegra og umhverfislegra aðstæðna, á getu hans til virkni á vinnumarkaði á grundvelli fyrirliggjandi gagna. Til framangreindra aðstæðna telst m.a. notkun hjálpartækja, aðstoð eða stuðningur sem eykur eða getur aukið getu umsækjanda til virkni á vinnumarkaði, sem og möguleikar hans á vinnumarkaði.

Við framkvæmd samþætts sérfræðimats er umsækjanda um örorku- eða hlutaörorkulífeyri rétt og skylt að taka þátt í meðferð máls hjá Tryggingastofnun og er stofnuninni heimilt að boða hlutaðeigandi umsækjanda í viðtal til sérfræðings á vegum stofnunarinnar, sbr. 47. gr. laga um almannatryggingar, nr. 100/2007.

3. gr. Gildistaka.

Reglugerð þessi, sem sett er samkvæmt heimild í 31. og 63. gr. laga um almannatryggingar, nr. 100/2007, öðlast gildi 1. september 2025. Frá gildistöku reglugerðar þessarar fellur brott reglugerð um örorkumat, nr. 379/1999.

B deild - Útgáfudagur: 29. ágúst 2025