Fara beint í efnið
Fyrri útgáfa

Prentað þann 28. mars 2024

Reglugerð með breytingum síðast breytt 18. júlí 2017

463/1998

Reglugerð um leyfi til farþegaflutninga með skipum.

Birta efnisyfirlit

1. gr.

Reglugerð þessi gildir innan íslenskrar lögsögu um öll íslensk skip sem flytja farþega í atvinnuskyni, á sjó, ám eða vötnum án tillits til stærðar. Undir farþegaflutninga í atvinnuskyni falla meðal annars skoðunar- og veiðiferðir með ferðamenn á skipum í atvinnuskyni.

Lög um eftirlit með skipum og reglugerð þessi gilda ennfremur um öll skip sem skráð eru á erlenda skipaskrá og flytja farþega í atvinnuskyni í íslenskum höfnum eða innan íslenskrar lögsögu, á ám eða á vötnum. Farþegaskip sem falla undir alþjóðasamning um öryggi mannslífa á hafinu (SOLAS) og erlend farþegaskip sem falla undir tilskipun 2009/45/EB um öryggi farþegaskipa í innanlandssigligum og sæta hafnarríkiseftirliti samkvæmt reglugerð um hafnarríkiseftirlit, eru undanskilin þessari reglugerð.

Með hugtakinu farþegi er í reglugerð þessari átt við hvern mann, eins árs að aldri eða eldri, sem er á skipi og er ekki skipverji.

2. gr.

Samgöngustofa ákveður leyfilegan hámarksfjölda farþega á skipi.

Skip í farþegaflutningum skal búið sætum þannig að allir farþegar geti setið samtímis í lokuðum vistarverum skipsins. Í skipum sem aðeins eru í ferðum sem taka að jafnaði innan við 4 klst. er þó heimilt að hafa sæti fyrir farþega í opnu rými. Sæti skulu vera minnst 0,5 m breið með minnst 0,9 m hæð ofan við sæti og minnst 0,75 m rými fyrir fætur, mælt fram frá sætisbaki.

Handrið eða skjólborðsklæðning við þilfar sem ætlað er farþegum, skulu ekki vera lægri en 1,0 m og þannig að ekki sé auðvelt að klifra yfir þau.

Um borð í skipi sem flytur 14 farþega eða færri skal vera salerni. Um borð í skipi sem flytur 15 - 50 farþega skulu vera minnst tvö salerni. Um borð í skipi sem flytur fleiri en 50 farþega skal vera eitt salerni fyrir hverja 25 farþega. Samgöngustofa er þó heimilt að ákveða að um borð í skipum sem aðeins eru í ferðum sem taka að jafnaði skemmri tíma en 4 klst. verði færri salerni, enda sé hreinlætisaðstaða á hverjum viðkomustað skipsins. Salerni skulu vera í sérstökum klefa með læsanlegri hurð. Salernin skulu vera lýst og loftræst. Á hverju salerni skal vera handlaug með rennandi vatni og frárennsli.

Samgöngustofa getur vikið frá ákvæðum þessarar greinar þegar sérstaklega stendur á.

3. gr.

Farþegaflutningar í atvinnuskyni með skipum sem reglugerð þessi gildir um eru háðir leyfi Samgöngustofunar. Skal slíkt leyfi aldrei gefið út til lengri tíma en eins árs í senn.

Útgáfa leyfis til farþegaflutninga skv. 1. mgr. er háð eftirfarandi skilyrðum:

1. Að framkvæmd hafi verið skoðun á skipinu í samræmi við lög um eftirlit með skipum.

2. Að skoðun skv. 1. tl. hafi leitt í ljós að fullnægt er ákvæðum laga um eftirlit með skipum og reglum settum skv. þeim sem um skipið gilda. Samgöngustofa getur veitt undanþágu frá kröfum sem gerðar eru til skipa að því marki sem heimilt er í viðeigandi reglum. Slík undanþága verður aðeins veitt hafi eigandi skips eða útgerðarmaður sýnt fram á með áhættumati, prófunum eða öðru að búnaður, efni, tæki, verklagsreglur eða annað, tryggi að minnsta kosti jafngilt öryggisstig og viðeigandi kröfum er ætlað að tryggja.

3. Að Samgöngustofa hafi samþykkt neyðaráætlun fyrir skipið sem komið verði fyrir á einum eða fleiri áberandi stöðum um borð. Á neyðaráætluninni skulu koma fram verkefni og skyldur sérhvers skipverja þegar neyðartilvik kemur upp.

4. Að Samgöngustofa hafi samþykkt teikningu af fyrirkomulagi öryggisbúnaðar skipsins sem komið verði fyrir á einum eða fleiri áberandi stöðum um borð.

5. Að Samgöngustofa hafi gefið út skrifleg fyrirmæli um fjölda í áhöfn skipsins sem ákveðinn er með hliðsjón af gerð skipsins, fyrirkomulagi þess og búnaði, svo og farsviði þess og útivist, þannig að fjöldi í áhöfn og skipting starfa fullnægi skilyrðum um að unnt sé að sinna öllum þáttum sem tryggja öryggi farþega, skipverja og skips. Um íslensk farþega- og kaupskip í millilandasiglingum gilda ákvæði laga um áhafnir íslenskra farþegaskipa og flutningaskipa nr. 76/2001, með síðari breytingum

6. Að eigandi skips eða skipstjóri hafi afhent Samgöngustofu skilríki um að keypt hafi verið vátrygging hjá tryggingafélagi með starfsleyfi hér á landi gegn tjóni á farþegum og farangri, sbr. V. kafla siglingalaga nr. 34/1985 með síðari breytingum. Vátryggingin skal einnig ná til barna sem eru yngri en eins árs og eru um borð með einhverjum farþega.

7. Að Samgöngustofa hafi samþykkt áætlun um öryggisfræðslu fyrir farþega.

Samgöngustofu er jafnframt heimilt að setja önnur sérstök skilyrði fyrir útgáfu leyfisins í því skyni að auka öryggi skipsins, skipverja og farþega. Slík skilyrði skulu kynnt eiganda skipsins með skriflegum og rökstuddum hætti.

4. gr.

Samgöngustofa gefur út leyfisskírteini til farþegaflutninga þegar sýnt hefur verið fram á að fullnægt er skilyrðum 3. gr. Heimilt er að hafa leyfisskírteinið á haffærisskírteini skipsins. Brot á skilyrðum leyfisins jafngilda broti á skilyrðum haffærisskírteinsins.

Eftirfarandi skal koma fram á leyfisskírteininu:

1. Gildistími leyfisins.

2. Leyfilegur hámarksfjöldi farþega.

3. Farsvið sem leyfið nær til.

4. Hámarkstímalengd hverrar ferðar.

5. Mönnun skipsins skv. fyrirmælum Samgöngustofu.

6. Heiti tryggingafélags, sbr. 6. tl. 2. mgr. 3. gr.

Leyfisskírteininu eða staðfestu afriti af því skal komið fyrir á áberandi stað um borð í skipinu þannig að það sé sýnilegt farþegum.

5. gr.

Skilmálar vátryggingar skv. þessari reglugerð skulu kynntir samgönguráðuneyti, Samgöngustofu og Vátryggingaeftirliti áður en vátrygging er boðin farsölum eða flutningsaðilum.

Falli vátrygging skv. 6. tl. 2. mgr. 3. gr. úr gildi áður en gildistími leyfisskírteinisins rennur út skal hlutaðeigandi vátryggingafélag tilkynna það vátryggingataka og Samgöngustofu þegar í stað. Þótt vátryggingin sé þannig úr gildi fallin ber félagið ábyrgð gagnvart þriðja manni á tjóni sem verður þar til fjórar vikur eru liðnar frá því að vátryggingafélagið tilkynnti vátryggingataka og Samgöngustofa um að vátryggingin væri úr gildi fallin, nema önnur fullnægjandi vátrygging hafi verið tekin. Renni leyfisskírteinið út innan fjögurra vikna frestsins ber félagið þó einungis ábyrgð til þess tíma.

6. gr.

Brot gegn reglugerð þessari varða viðurlögum skv. 29. gr. laga um eftirlit með skipum nr. 35/1993, með síðari breytingum, nema þyngri refsing liggi við eftir öðrum lögum. Með mál út af brotum gegn reglugerð þessari skal fara að hætti opinberra mála.

7. gr.

Reglugerð þessi er sett samkvæmt lögum um eftirlit með skipum nr. 35/1993, með síðari breytingum og siglingalögum nr. 34/1985 með síðari breytingum og öðlast gildi 1. ágúst 1998.

Fyrirvari

Reglugerðir eru birtar í B-deild Stjórnartíðinda skv. 3. gr. laga um Stjórnartíðindi og Lögbirtingablað, nr. 15/2005, sbr. reglugerð um útgáfu Stjórnartíðinda nr. 958/2005.

Sé misræmi milli þess texta sem birtist hér í safninu og þess sem birtur er í útgáfu B-deildar Stjórnartíðinda skal sá síðarnefndi ráða.