Reglugerð um breytingu á reglugerð nr. 350/2009 um kennslanefnd.

1. gr.

Í stað orðsins "innanríkisráðherra" í 3. mgr. 1. gr. reglugerðarinnar kemur: ráðherra.

2. gr.

3. gr. reglugerðarinnar orðist svo:

Formaður nefndarinnar ákveður í samráði við hlutaðeigandi lögreglustjóra, hvort nefndin skuli starfa fullskipuð eða einstakir nefndarmenn taki þátt í rannsókn tiltekins máls. Á sama hátt skal ákveða hvort kveðja skuli aðra sérfræðinga til. Í vafatilvikum skal bera málið undir ríkislögreglustjóra.

3. gr.

4. gr. reglugerðarinnar orðist svo:

Störf nefndarinnar fara að jafnaði fram í Reykjavík. Þó getur formaður nefndarinnar ákveðið að höfðu samráði við hlutaðeigandi lögreglustjóra hvort störf nefndarinnar skuli fara fram að nokkru eða öllu leyti á vettvangi eða annars staðar, og lýtur kennslanefnd þá stjórn viðkomandi lögreglustjóra. Í vafatilvikum skal bera málið undir ríkislögreglustjóra.

4. gr.

Eftirfarandi breytingar verða á 5. gr. reglugerðarinnar:

1. Í stað orðsins "ríkislögreglustjóranum" í 1. mgr. kemur: formanni nefndarinnar.
2. 2. mgr. orðist svo:
   Þegar tilkynning berst frá lögreglustjóra um meiri háttar slysfarir virkjast gildandi hópslysaáætlun í því lögregluumdæmi þar sem slys hefur orðið, í samræmi við ákvæði áætlunarinnar. Með sama hætti geta séráætlanir einnig virkjast við meiri háttar slysfarir, svo sem við flugslys.
3. 3. mgr. orðist svo:
   Lögreglustjórar geta leitað eftir aðstoð frá kennslanefndinni í öðrum tilvikum. Formaður nefndarinnar ákveður hvort orðið skuli við slíkri beiðni. Í vafatilvikum skal bera málið undir ríkislögreglustjóra.

5. gr.

Eftirfarandi breytingar verða á 7. gr. reglugerðarinnar:

1. Í stað orðsins "ríkislögreglustjóra" í heiti greinarinnar kemur: formanns nefndarinnar.
2. Í stað orðsins "ríkislögreglustjóra" í a-lið 1. mgr. kemur: formanni nefndarinnar.
3. Í stað orðsins "ríkislögreglustjóra" í c-lið 1. mgr. kemur: formanni nefndarinnar.

6. gr.

Eftirfarandi breytingar verða á 8. gr. reglugerðarinnar:

1. 2. mgr. orðist svo:
   Formaður skal sjá til þess að fundargerð verði rituð.
2. Á eftir 3. mgr. 8. gr. bætist ný málsgrein, svohljóðandi:
   Kennslanefnd ber að senda embætti ríkislögreglustjóra ársskýrslu, fyrir síðastliðið ár, þar sem gerð er grein fyrir störfum nefndarinnar, þar á meðal upplýsingar um á hvaða grundvelli greiningar voru framkvæmdar, upplýsingar um samanburðartengsl og útlistun á ferðum og ferðakostnaði vegna alþjóðasamstarfs. Ársskýrslu ber að skila fyrir lok febrúar ár hvert.
3. Heiti 8. gr. orðist svo: Fundir nefndarinnar og upplýsingamiðlun til embættis ríkislögreglustjóra.

7. gr. Gildistaka.

Reglugerð þessi, sem sett er samkvæmt 43. gr. lögreglulaga nr. 90/1996, öðlast þegar gildi.

Dómsmálaráðuneytinu, 15. mars 2024.

Guðrún Hafsteinsdóttir.

Haukur Guðmundsson.