Reglugerð um jöfnun námskostnaðar. - Brottfallin

nr 746 2000.doc

746/2000

REGLUGERÐ
um jöfnun námskostnaðar.

1. gr.
Almenn skilyrði.

Nemendur á framhaldsskólastigi sem fullnægja eftirtöldum skilyrðum eiga rétt til námsstyrkja til jöfnunar á fjárhagslegum aðstöðumun vegna búsetu svo sem nánar er kveðið á um í reglugerð þessari:

Nemandi stundar reglubundið nám á framhaldsskólastigi hér á landi, sem ekki er á háskólastigi eða gerir sambærilegar kröfur til undirbúningsmenntunar og nám á háskólastigi, enda sé um að ræða a.m.k. eins árs skipulagt nám við framhaldsskóla sem falla undir ákvæði laga um framhaldsskóla nr. 80/1996, með áorðnum breytingum. Námsstyrkjanefnd er heimilt að styrkja annað hliðstætt nám á framhaldsskólastigi.

Nemandi nýtir ekki rétt til láns úr Lánasjóði íslenskra námsmanna eða nýtur hliðstæðrar fyrirgreiðslu.

2. gr.
Skilgreiningar.

Í reglugerð þessari hafa eftirfarandi hugtök þá merkingu sem hér greinir:

a.	Reglubundið nám. Nemandi telst hafa fullnægt skilyrði a-liðar 1. gr. hafi hann tekið próf til fullnustu a.m.k. 12 eininga námi á önn eða skóli staðfestir námsárangur með ástundunarvottorði, ef námi lýkur ekki með prófi. Ef námi er ekki lokið vegna veikinda skal skóli staðfesta móttöku á fullgildu læknisvottorði.
b.	Sambærilegt nám. Við mat á því hvort sambærilegt framhaldsnám verði stundað í heimabyggð eða ekki er alfarið vísað til námsbrautarlýsingar samkvæmt aðalnámskrá framhaldsskóla, þegar um nám á 1. ári samkvæmt skipulagi skóla er að ræða. Á síðari stigum framhaldsnáms er vísað til eðlis og gæða skóla eða einstakra námsáfanga að mati umsækjanda. Í fylgiskjali I er listi yfir staði þaðan sem nám á tilgreindum brautum á 1. ári telst ekki styrkhæft vegna dvalar fjarri lögheimili.
c.	Dvalarstyrkur. Dvalarstyrkur er þríþættur þ.e. ferðastyrkur, fæðisstyrkur og húsnæðisstyrkur.

3. gr.
Námsstyrkjanefnd og LÍN.

Námsstyrkjanefnd úthlutar styrkjum til styrkhæfra nemenda að jafnaði einu sinni á ári. Nefndin auglýsir eftir umsóknum um námsstyrki á haustönn og skulu umsóknir berast á þar til gerðum eyðublöðum.

Námsstyrkjanefnd hefur starfsstöð í húsakynnum Lánasjóðs íslenskra námsmanna og annast sjóðurinn alla umsýslu og nauðsynlega framkvæmd fyrir nefndina. LÍN tekur m.a. við umsóknum um námsstyrki, sér um úrvinnslu þeirra, leitar eftir upplýsingum frá skólum um hvort nemandi teljist hafa stundað reglubundið nám, sbr. 2. gr., og annast útborgun námsstyrkja.

Til staðfestingar á því að nemandi stundi reglubundið nám á framhaldsskólastigi ber viðkomandi framhaldsskóla, að ósk námsstyrkjanefndar, að láta nefndinni í té upplýsingar þar að lútandi áður en útborgun námsstyrkja fer fram.

Miða skal við að útborgun námsstyrkja fari fram í tvennu lagi eða jafnskjótt og framhaldsskólar staðfesta námsárangur eða námsástundun nemandans í lok haustannar og í lok vorannar.

Athugasemdir við niðurstöður námsstyrkjanefndar skulu vera skriflegar og studdar gögnum eftir eðli máls. Þær skulu berast innan 30 daga frá birtingu á niðurstöðu nefndarinnar.

4. gr.
Dvalarstyrkir.

Þeir sem ekki geta stundað sambærilegt nám frá lögheimili sínu og dvelja þess vegna fjarri lögheimili og fjölskyldu sinni geta átt rétt á dvalarstyrk. Fullur dvalarstyrkur nær til ferðastyrks, fæðisstyrks og húsnæðisstyrks. Námsstyrkjanefnd ákveður upphæð dvalarstyrks. Skilyrði dvalarstyrks er að dvalarstaður nemanda vegna náms sé a.m.k. 30 km frá lögheimili hans og foreldra eða forráðamanna (annars eða beggja).

Áður en útborgun fer fram í lok haustannar ákveður námsstyrkjanefnd upphæð fulls dvalarstyrks með hliðsjón af heildarfjárhæð sem veitt er til jöfnunar á námskostnaði á fjárlögum ár hvert.

Námsstyrkjanefnd er heimilt að víkja frá skilyrði um búsetu fjarri foreldri eða forráðamanni, sbr. 2. mgr., ef eitthvert eftirtalinna atriða er uppfyllt:

1)	lögheimilishúsnæði er í eigu námsmanns;
2)	námsmaður hefur sótt fulla vinnu frá lögheimili sínu og hefur samfellt verið lengur en 7,5 mánuði á vinnumarkaði;
3)	námsmaður og maki hafa barn á framfæri sínu, maki dvelur í lögheimilshúsnæði og skráð sambúð á lögheimili hefur varað í a.m.k. eitt ár.

5. gr.
Svæðaskipting.

Upphæð dvalarstyrks tekur mið af lögheimili og er landinu skipt í þrjú svæði: svæði A (höfuðborgarsvæðið og Akureyri); svæði B (sveitarfélög og nágrannabyggðir með framhaldsskóla); svæði C (önnur byggðalög). Í fylgiskjali II er gerð nánari grein fyrir svæðaskiptingunni.

Námsstyrkjanefnd er heimilt að veita allt að 15% uppbót á fullan dvalarstyrk til nemenda sem eiga lögheimili á svæði B og allt að 30% uppbót á fullan dvalarstyrk til nemenda sem eiga lögheimili á svæði C.

6. gr.
Styrkir vegna skólaaksturs.

Þeir nemendur sem stunda nám við framhaldsskóla utan höfuðborgarsvæðis, sbr. skilgreiningu í fylgiskjali II og sækja nám frá lögheimili fjarri skóla geta átt rétt á styrk vegna skólaaksturs. Heildarupphæð styrkja vegna skólaaksturs er ákveðin í fjárlögum ár hvert.

Styrkir vegna skólaaksturs skulu annars vegar renna til tiltekinna skóla sem skipuleggja akstur fyrir nemendur og hins vegar beint til nemenda enda uppfylli þeir eftirtalin skilyrði:

1)	sækja framhaldsskóla sem eru á svæði B, sbr. 5. gr., og geta ekki nýtt sér skipulagðan akstur á vegum skóla;
2)	sækja skóla frá lögheimili sínu og lögheimili foreldra eða forráðamanna, annars eða beggja;
3)	lögheimili er ekki í nágrenni skóla, sbr. yfirlit á fylgiskjali III yfir staði, sem teljast í nágrenni skóla í þessu samhengi.

Námsstyrkjanefnd er heimilt að víkja frá skilyrði um búsetu hjá foreldri eða forráðamanni, sbr. 2. tl. 2. mgr., ef eitthvert skilyrða 4. mgr. 4. gr. er uppfyllt.

Námsstyrkjanefnd skal í upphafi árs auglýsa eftir umsóknum frá skólum sem áhuga hafa á að skipuleggja daglegan akstur framhaldsskólanemenda næstkomandi skólaár. Útborgun styrkja til skóla skal lokið fyrir 1. desember ár hvert. Áður en úthlutun styrkja beint til nemenda fer fram í lok haustannar ákveður námsstyrkjanefnd upphæð styrksins með hliðsjón af fjárlögum ár hvert.

7. gr.
Gildistaka

Reglugerð þessi er sett samkvæmt 6. gr. laga nr. 23/1989 um ráðstafanir til jöfnunar á námskostnaði og öðlast þegar gildi. Jafnframt fellur úr gildi reglugerð nr. 779/1999.

Menntamálaráðuneytinu, 24. október 2000.

Björn Bjarnason.

Guðríður Sigurðardóttir.